Benedikt hættur Drangeyjarsundi vegna erfiðra aðstæðna

Sjósundkappinn Benedikt S. Lafleur varð að hætta Drangeyjarsundi sínu nú í eftirmiðdaginn þegar hann var rétt um hálfnaður vegna erfiðra skilyrða. Benedikt sagði í samtali við Vísi að sjórinn hefði reynst kaldari en hann hefði reiknað með og þegar hann hafi verið farinn að fá velgju vegna kuldans hafi hann ákveðið að hætta í þetta sinn, en hann synti ósmurður.

„Ég hafði synt í Eyjafirði í síðustu viku og gengið vel. Ég hélt að hitinn væri svipaður í Skagafirði en svo var ekki," sagði Benedikt og telur að Drangeyjarsund sé eitt erfiðasta sund í heimi. Hann segir þetta dýrmæta reynslu en að hann reyni ekki aftur við Drangeyjarsundið þetta árið enda muni sjórinn bara kólna nú í haust.

Sundið frá Drangey til Reykja á Reykjaströnd er sjö kílómetrar og hafa örfáir menn náð að ljúka því.