Lögregla hafði afskipti af tugum utanbæjarbarna á Ljósanótt

Á Ljósanótt síðastliðinn laugardag þurfti lögreglan í Reykjanesbæ að hafa afskipti af 60 börnum sem annað hvort voru ölvuð eða höfðu gerst brotleg við reglur um útivistartíma. Helmingur barnanna var frá sveitarfélögum utan Suðurnesja. Flest börnin voru færð í sérstakt athvarf sem starfrækt var í bænum og þurftu sumir að bíða lengi eftir foreldrum sínum enda um langan veg að fara.

Skúli Jónsson hjá lögreglu Reykjanesbæjar segir að lögregla hafi farið með 55 börn í athvarfið sem starfrækt var í samstarfi við útideild, barnaverndarnefnd og foreldrafélög í bænum. Þá hafi fimm einstaklingar sem ekki hafi náð 18 ára aldri verið vistaðir á lögreglustöð bæjarins sökum ástands þeirra. Af þeim 55 sem flutt voru í athvarfið voru 43 þar vegna ölvunar en 12 vegna útivistarbrota. 29 þeirra voru búsett utan Suðurnesja.

Skúli segir að börnin hafi verið sótt af forráðamönnum sínum og hafi sum þeirra þurft að dvelja þar í dágóða stund sökum þess að foreldrar þurftu að fara um langan veg til að sækja þau. Eitt barnið endaði kvöldið í neyðarvistun á meðferðarheimilinu Stuðlum.

Börnin voru að sögn Skúla frá Reykjavík og úr fleiri bæjum á höfuðborgarsvæðinu. Hann segist ekki hafa skýringu á því hvers vegna svo mörg utanbæjarbörn hafi verið á svæðinu. Lögreglan hafi hins vegar verið með strangt eftirlit í bænum vegna hátíðarhaldanna og kannski hafi utanbæjarbörnin haldið að þau væru að fara á einhverskonar útihátíð. Skúli tekur fram að börnin hafi upp til hópa verið mjög kurteis í öllum samskiptum við lögregluna.