Viðskiptaráðherra væntanlega á Volvo

Viðskiptaráðuneytið mun að öllum líkindum fjárfesta í forláta Volvo XC90 jeppa en eins og fram kom í fréttum Stöðvar 2 á dögunum ók viðskiptaráðherra um á óvistvænasta bílnum í ráðherraflotanum. Volvoinn er með díselvél og töluvert vistvænni en bensínhákurinn sem ráðherrann hefur ferðast í að undanförnu.

Til þessa hefur ráðuneytið haft til umráða jeppa af gerðinni Mercedes Benz M350 sem áður tilheyrði Guðna Ágústssyni, fyrrverandi landbúnaðarráðherra. Miðað við upplýsingar á heimasíðu Orkusetursins blæs sá bíll 5,6 tonnum af koltvíssýringi út í andrúmsloftið á hverju ári miðað við 20 þúsund kílómetra akstur og meðalverð á eldsneyti eins og það er í dag.

Volvoinn gerir betur, en hann sleppir aðeins út 4,8 tonnum. Björgvin G. Sigurðsson, viðskiptaráðherra, mun líka spara ríkinu töluverðar upphæðir þegar litið er til eldsneytiseyðslu. Orkusetrið reiknar það út að eldsneytiskostnaður Volvósins sé rúmar 221 þúsund krónur á ári og er það tæpum 70 þúsund krónum lægri upphæð en reiknast á gamla bílinn, enda er uppgefin eldsneytiseyðsla um 1800 lítrar á ári en Bensinn er sagður eyða 2340 lítrum á ári, miðað við 20 þúsund kílómetra akstur á ári.

Björgvin G. Sigurðsson, viðskiptaráðherra, segir í samtali við Vísi að líklegast verði Volvóinn fyrir valinu þó ekki sé búið að kaupa hann enn. „Við höfum kannað marga bíla undanfarið og það lítur út fyrir að Volvo með díselvél verði fyrir valinu," segir Björgvin. Hann segir að verið sé að vinna í málinu, komast að samkomulagi um verð og þessháttar, en samkvæmt listaverði kostar Volvo XC90 um sex og hálfa milljón króna.