Pirrar mig þegar ungt fólk svarar mér á ensku

Það pirrar mig þegar ungt fólk í afgreiðslustörfum svarar mér á ensku, segir hollensk kona sem hefur lært íslensku þau þrjú ár sem hún hefur búið á landinu. Að hennar mati er lykillinn að því að nýbúar læri íslensku að byrjað sé snemma á því að tala eingöngu íslensku við þá.

Josephina Maas kom fyrst til Íslands sem ferðamaður árið 1998. Á dögunum lét hún verða af því að skoða eldstöðvarnar í Vestmannaeyjum, sem hún heyrði fljótlega af þegar hún flutti til Íslands fyrir þremur árum.

Við komuna til landsins fór Josephina á íslenskunámskeið, en málið lærði hún líka við vinnu sína í sveitum landsins. Josephina segir beygingarfræði íslenskunnar flókna, og fyrir hennar tungu er harða r-hljóðið erfiðast.