Annar stórbruninn í Vaðlaheiði á skömmum tíma

Sumarbústaður eyðilagðist í eldi í Vaðlaheiði í gær. Þetta er annar stórbruninn í Vaðlaheiðinni á skömmum tíma og leitar lögreglan brennuvargs.

Sumarhúsið er nýlegt og stendur í landi Geldingsár í svokallaðri Heiðarbyggð beint á móti Akureyri. Bústaðurinn er talinn gjörónýtur eftir brunann en það hafði neikvæð áhrif á slökkvistarf að mjög hvasst var á svæðinu þegar eldurinn kom upp.

Eldsupptök eru óljós en athygli vekur að fyrir skemmstu brann bátaskýli skammt frá og er talið að í því tilviki hafi verið um íkveikju að ræða. Þá stendur enn yfir leit að þeim sem kveiktu í íbúðarhúsi á Oddeyrinni í vor og staðfestir lögreglan að brennuvargur gangi laus í Eyjafirði.

Eigandi sumarhússins hafði brugðið sér stuttlega frá og brá því mikið þegar hann sneri aftur og sá húsið standa í ljósum logum.