Héraðsdómur fellst á heilaskaðavörn í nauðgunarmáli

Héraðsdómur Reykjavíkur samþykkti í morgun að kvaddir verði til matsmenn til að meta sakhæfi Jóns Péturssonar, margdæmds nauðgara. Jón var í apríl síðastliðnum dæmdur í fimm ára fangelsi í Hæstarétti fyrir hrottfengin brot gegn tveimur konum og í júní fékk hann annan fimm ára dóm fyrir að hafa nauðgað og misþyrmt á annan hátt fyrrverandi sambýliskonu sinni. Krafan um matsmann, var að sögn Sveins Andra Sveinssonar, lögmanns Jóns, komin fram vegna þess að geðlæknir á Litla-Hrauni fann skaða á framheila sem í sumum tilvikum geti valdið persónuleikaröskun. Þann skaða telur Jón sig hafa fengið í Egyptalandi fyrir átta árum.