Búið að finna strokupilta

Piltarnir tveir sem struku frá meðferðarheimilinu Bergi í Aðaldal á sunnudaginn fundust í íbúð í efra Breiðholti rétt fyrir klukkan átta í kvöld. Það var íbúi sem gerði lögreglunni viðvart eftir að hann bar kennsl á drengina. Bifreiðin sem þeir stálu fannst skömmu síðar á Akureyri.

Samkvæmt upplýsingum frá lögreglunni á höfuðborgarsvæðinu voru drengirnir, sem báðir eru fimmtán ára gamlir, þreyttir og slæptir þegar þeir komu í leitirnar. Þeir fundust í íbúð í efra Breiðholti en íbúi kannaðist við drengina og lokkaði þá til sín áður en hann gerði lögreglunni viðvart.

Bifreiðin sem piltarnir stálu fannst á Akureyri en ekki er vitað að svo stöddu hvernig þeir komust til Reykjavíkur. Samkvæmt upplýsingum frá lögreglunni á Húsavík var sprungið dekk á bifreiðinni þegar hún fannst en að öðru leyti var hún óskemmd. Allt bendir til þess að sprungið hafi á bifreiðinni í akstri.

Piltarnir verða fluttir á meðferðarstöðina Stuðlar þar sem þeir gista í nótt. Barnarverndaryfirvöld muni síðan ákveða framhaldið að sögn lögreglunnar.