Ný heimasíða býður reykingamönnum félagslegan stuðning til að hætta

Reykingamönnum sem gengur illa að losna undan níkótínfíkninni býðst nú nýtt hjálpartæki. Í gegnum netið geta þeir sótt félagslegan stuðning til að hætta að reykja.

Lýðheilsustöð og Reyksíminn opnuðu í dag nýja heimasíðu www.reyklaus.is fyrir reykingamenn sem vilja hætta að reykja. Þeir sem skrá sig fá send stuðningsskilaboð, aðgang að dagbók og gestabók. Þá er hægt að skrá sig inn á spjallsvæði þar sem hægt er að deila reynslu sinni og baráttu með öðrum í sömu sporum.

Guðrún Árný umsjónarmaður Reyksímans og heimasíðunnar reyklaus.is segir rannsóknir sýna að reykingarmönnum gengur betur að hætta ef þeir fá félagslegan stuðning.

Reyksíminn hefur verið starfræktur frá árinu 2000 og er ókeypis að hringja þangað og fá ráðgjöf. Guðrún segir misjafnt hvaða ástæður liggja að baki þegar fólk byrjar aftur að reykja.

Guðrún segist fullviss um að vefurinn og reyksíminn með númerið 800-6030 hjálpi fólki að hætta að reykja.