Meira en helmingur tekna Íslandspósts á samkeppnismarkaði

Íslandspóstur gengur langt út fyrir verksvið sitt í samkeppni við einkafyrirtæki, segja talsmenn Hans Petersen hf. Forstjóri Íslandspósts segir að rúmur helmingur tekna Íslandpósts komi frá starfsemi á samkeppnismarkaði.

Eins og fram kom í fréttum okkar í gær vill Sigurður Kári Kristjánsson alþingismaður einkavæða og selja Íslandspóst. Hann segir algerlega ólýðandi að Íslandspóstur sé í beinni samkeppni við einkafyrirtæki.

Kjartan Örn Sigurðsson, framkvæmdastjóri Hans Petersen, tekur undir þessi orð Sigurðar Kára og segir að fyrirtæki sitt hafi verið í afar ósanngjarni samkeppni við Íslandspóst í langan tíma.

Hann segir að Íslandspóstur sé ríkisfyrirtæki sem starfi þvert á stefnu stjórnvalda. Fyrirtækið sé komið í rekstur í beinni samkeppni við fjölda einkafyrirtækja í starfsemi sem eigi ekkert skylt við póstflutninga, til dæmis í framleiðslu á brúðkaups- og jólakortum.

Ingimundur Sigurpálsson, forstjóri Íslandspósts, segir að í samþykktum Íslandspósts komi skýrt fram að tilgangur félagsins sé að reka verslun sem tengist starfsemi þess.

Ingimundur segir að það sé pólitískra yfirvalda að ákveða hvað þau geri við hlutabréfin í félaginu. Hann segir að rúmlega helmingur af tekjum Íslandpósts komi frá starfsemi á samkeppnismarkaði.

Ingimundur segir að einkaréttarhluti fyrirtækisins sé algerlega aðgreindur bókhaldslega frá samkeppnishluta þess. Einkaréttarhlutinn sé alls ekki að greiða niður samkeppnishlutann. Hann segir að Íslandspóstur sé rekinn með það í huga að tryggja eigendunum eðlilegan arð.