Sex réttindalausir ökumenn teknir á höfuðborgarsvæðinu

Lögreglan á höfuðborgarsvæðinu stöðvaði sex réttindalausa ökumenn um síðustu helgi. Einn karlmaður á sextugsaldri var tekinn í Hafnarfirði. Sá sagðist hafa gleymt ökuskírteininu heima en við nánari athugun kom í ljós að búið var að svipta manninn ökuleyfi ævilangt.

Samkvæmt upplýsingum frá lögreglunni á höfuðborgarsvæðinu var annar ökumaður á fertugsaldri tekinn í Hafnarfirði. Sá framvísaði skilríkjum tíu ára yngri manns. Þegar sannleikurinn kom í ljós reyndist ökumaðurinn aldrei hafa öðlast ökuréttindi.

Í Breiðholtinu var ökuferð 16 ára gamallar stúlku stöðvuð og þá var í sama hverfi tekinn þrítugur karlmaður sem var búinn að missa ökuskírteini. Annar ökumaður á tvítugsaldri var stöðvaður í Háleitishverfi en sá var einnig búinn að missa ökuskírteini.

Í Árbæ hafði lögreglan hendur í hári 19 ára pilts sem ekki gat framvísað ökuskírteini enda aldrei öðlast réttindi. Pilturinn var ölvaður, ekki með bílbelti og með eitt nagladekk undir bílnum. Það dekk sagðist pilturinn hafa fengið að láni. Við nánari athugun reyndist dekkið vera stolið og þá fannst einnig stolið reiðhjól í bílnum. Að sögn lögreglu reyndir erfitt að láta piltinn undirgangast öndunarpróf og bar hann því við að hann kynni ekki að blása. Það gekk þó að lokum og var pilturinn handtekinn.