Ósamræmi fagfólks ein ástæða nauðgunarsýknu

Algert ósamræmi í framburði vakthafandi læknis og hjúkrunarfræðings á neyðarmóttöku fyrir fórnarlömb kynferðisbrota var ein af ástæðum þess að 33 ára karlmaður var í dag sýknaður af því að hafa nauðgað greindarskertri konu á heimili sínu í maí á síðasta ári.

Ekki var talið sannað að maðurinn, sem einnig er greindarskertur en töluvert minna en konan, hafi þröngvað konunni til samræðis.

Hjúkrunarfræðingurinn á neyðarmóttökunni sagði greinilegt að konunni hefði verið þröngvað til samræðis og bæri þess andleg og líkamleg merki. Læknirinn á neyðarmóttökunni merkti hins vegar ekkert í fari fórnarlambsins sem benti til þess að henni hefði verið nauðgað.

Fyrst framburður læknisins var í svo beinu ósamræmi við framburð hjúkrunarfræðingsins tók dómurinn ekkert mark á framburði þess efnis að fórnarlambið bæri skýr merki þess að henni hefði verið þröngvað til samræðis.