Iðnaðarráðherra tekur vel í beiðni um hlutafélagavæðingu

Meirihluti stjórnar Orkuveitunnar ákvað í morgun að óska eftir því að fyrirtækinu verði breytt í hlutafélag. Til þess að svo geti orðið þarf iðnaðarráðherra að leggja fram frumvarp um málið. Hann segist taka slíkri beiðni vel að því gefnu að tryggt verði að Orkuveitan verði áfram í félagslegri eigu.

Stjórn Orkuveitunnar hittist á fundi í morgun og samþykkti meirihluti hennar að óska eftir því við eigendur fyrirtækisins að þeir breyti rekstarformi Orkuveitunnar í hlutafélag. En þetta gengur eftir verður Orkuveitan sjötta orkufyrirtækið sem breytt er í hlutafélag á síðustu árum.

Borgarstjóri segir hlutafélagavæðinguna mikla þýðingu fyrir Reykjavíkurborg sem er stærsti eigandi Orkuveitunnar. Borgarsjóður losni undan ábyrgð lána, þetta lækki skatta sem Orkuveitan þarf að greiða auk þess sem Eftirlitsstofnun EFTA hefur gert athugasemdir þar sem fyrirtækið er í samkeppni við hlutafélög á orkumarkaði.

Fulltrúar minnihlutans í borgarstjórn Reykjavíkur sem sæti eiga í stjórn Orkuveitunnar, þau Dagur B. Eggertsson og Svandís Svavarsdóttir, gagnrýna hvernig staðið var að málum en þau greiddu atkvæði gegn tillögunni. Þau segja lítinn undirbúning hafa verið að breytingunni auk þess sem skort hafi gögn til að hægt væri að taka ákvörðun í málinu. Svandís segir ákvörðunina skref í átt að einkavæðingu. Vilhjálmur Þ. Vilhjálmsson borgarstjóri segir alveg ljóst að Orkuveitan verði ekki einkavædd.

Til að hægt sé að breyta Orkuveitunni í hlutafélag þarf Alþingi að gera lagabreytingu. Eigendur Orkuveitunnar þurfa því að leita til Össurar Skarphéðinssonar iðnaðarráðherra og biðja hann að leggja fram frumvarp þess efnis. Össur segir að hann sé þeirrar skoðunar að almannaveiturnar í landinu þurfi að vera í félagslegri meirihlutaeign. Hann vilji ekki stuðla að því að þau gæði sem felast í góðri og ódýri heimilisorku séu tekin af fólki. Verði tryggt að það sé ekki gert sér Össur því hins vegar ekkert til fyrirstöðu rekstrarformi Orkuveitunnar sé breytt.