Slógust við karlmann um dósir

Slagsmál um dósir voru meðal þeirra líkamsárásarmála sem komu til kasta lögreglunnar um helgina. Eftir því sem segir í frétt lögreglunnar slógust tvær konur við karl á fertugsaldri en þær ætluðu að hafa af honum tómar gosdrykkjaumbúðir sem hann hafði safnað.

Alls voru tíu líkamsárásir tilkynntar til lögreglunnar um helgina og átti helmingur þeirra sér stað í miðborginni. Meðal þeirra sem fengu að kenna á því var dyravörður á skemmtistað. Kona sem virtist eiga erfitt með að sætta sig við að búið var loka staðnum kýldi dyravörðinn en til stóð að vísa henni út.

 Þá skarst piltur um tvítugt á höfði þegar hann hugðist gera upp sakir við hálfþrítugan karl í Háaleitishverfi og stúlka á unglingsaldri marðist á höfði þegar í hana var kastað flösku.