Listmenntaskóli í húsnæði HR við Kringluna

Stefnt er að því að stofna listmenntaskóla í húsnæði Háskólans í Reykjavík við Ofanleiti þegar hann flytur í nýtt húsnæði í Vatnsmýri haustið 2010.

Það var sjálfseignarsofnun Viðskiptaráðs Íslands um viðskiptamenntun sem fól skólanefnd Verzlunarskóla Íslands að stofna þar skóla á framhaldsskólastigi. Niðurstaðan er sú að stofna Listmenntaskóla Íslands, öflugan skóla þar sem saman fer fjölbreytt nám í listum á framhaldsskóla- og fagháskólastigi og metnaðarfullt og kröfuríkt bóknám til stúdentsprófs, að hluta til í samvinnu við Verzlunarskóla Íslands eins og segir í tilkynngu.

Sölvi Sveinsson, sem verið hefur skólameistari Verzlunarskólans hættir því og mun stýra undirbúningi að stofnun hins nýja skóla. Auk þess hefur Elfa Hrönn Guðmundsdóttir rekstrarhagfræðingur verið ráðinn til þess að gera ítarlega þarfagreiningu og kostnaðaráætlun fyrir skólann.

Enn fremur hefur viðskiptaráð hefur nú skipað starfshóp til að vinna með þeim að málinu. Í honum eru Bryndís Hrafnkelsdóttir formaður skólanefndar VÍ, Ingi Ólafsson skólastjóri VÍ, Haraldur Ingi Birgisson, lögfræðingur Viðskiptaráðs Íslands, Kristín B. Björgvinsdóttir hönnuður, Kristján Jónsson myndlistamaður, Sigrún Hjálmtýsdóttir söngkona, María Ellingsen leikkona, Ingibjörg Pálmadóttir arkitekt og Árni Heimir Ingólfsson, dósent í Listaháskóla Íslands.

Hópurinn mun hittast reglulega til að leggja línur fyrir Listmenntaskólann og fram undan eru viðræður við menntamálaráðuneyti og sveitarfélög, forstöðumenn og stjórnir listaskóla í borginni og ýmsa þá aðila sem eiga hagsmuna að gæta. Stefnt er að því að taka ákvörðun um skólastofnunina í apríl 2008.