Flugorrustur æfðar við Íslandsstrendur á Norðurvíkingi

Bandarískir og Norskir orrustuflugmenn börðust á F15 og F16 herþotum í lofthelgi Íslands í dag - en einungis í æfingaskyni. Loftvarnir Íslands voru æfðar suður af Reykjanesi á heræfingunni Norðurvíkingur í dag, en hún hefur tekist vel að sögn talsmanns æfingarinnar.

Á heræfingunni er áhersla lögð á að samstilla þá aðila sem koma að vörnum landsins á hugsanlegum hættu- og ófriðartímum.

Friðþór Eydal, talsmaður Norðurvíkings, segir að markmiðið með heræfingunni sé meðal annars að æfa flutning á liðsafla hingað þegar hætta steðjar að. Fyrirhugað er að æfingar af þessu tagi verði reglubundinn hluti í vörnum Íslands.

Æfingin Norðurvíkingur skiptist upp í tvo aðskilda þætti, æfingu gegn hryðjuverkum og loftvarnaæfingu.

Í loftvarnaæfingunni reynir mjög á orrustuþoturnar fimm sem hingað eru komnar, þrjár F-15 frá Bandaríkjunum og tvær F-16 frá Noregi. Þá fóru tvær KC-135 eldsneytisflugvélar Bandaríkjamanna létt með að dæla eldsneyti yfir í orrustuvélarnar á flugi suður af Reykjanesi þar sem stærstur hluti æfinganna fór fram í dag.

Sérfræðingar Bandaríkjahers fullyrtu í morgun að afar mikilvægt væri að reyna þessa aðgerð sérstaklega þar sem illskeytt veður hér getur kallað á miklu meiri eldsneytisnotkun en við hefðbundnari kringumstæður.

Talsmenn Bandaríkjahers sem hér eru staddir fullyrtu að mjög mikilvægt væri að flytja herliðin hingað til lands til að samstilla þau.

Norðmenn eru hér með D-3 eftirlits- og kafbátaleitarflugvél og Atlantshafsbandalagið leggur til tvær AWAC´s-ratsjárflugvélar. Þá er danska varðskipið Tríton einnig við landið vegna hugsanlegra leitar- og björgunaraðgerða. Landhelgisgæslan leggur einnig til tvær björgunarþyrlur.

Í æfingum gegn hugsanlegum hryðjuverkum eru 20 norskir sérsveitarmenn mættir hingað ásamt sex dönskum stallbræðrum sínum auk fimmtán manna frá Lettlandi. Jón Bjartmarz hjá Ríkislögreglustjóra segir þessa æfingu mjög mikilvæga fyrir íslenska sérsveitarmenn.

Hundrað mótmæltu Norðurvíkingi