Verð á skólatöskum mun hærra hér á landi

Vinsælustu skólatöskurnar á markaðinum kosta allt að áttatíu prósent meira hér en í Danmörku. Grunnskólar landsins verða settir í næstu viku.

Jeva skólatöskur hafa verið með þeim vinsælustu síðustu ár og segja sumir þær vera Rolls Roysinn í skólatöskum. Að undanförnu hefur verið mikil umræða um það á spjallvefjum á netinu hversu dýrar þessar töskur eru hér á landi, þar sem þær eru mun ódýrari í Danmörku.

Jeva-skólatöskur kosta 10.980 krónur hér á landi en í Danmörku kosta þær frá 6.000 krónum og að 7.200 krónum. Það þýðir að töskurnar eru ríflega áttatíu dýrari hér á landi en í Danmörku.

Ragnar Veigar Guðmundsson, vörustjóri hjá Pennanum segir verðmuninn skýrast af því að hér séu svo háir tollar, markaðurinn sé lítill, flutningskostnaður hár og virðisaukaskattur sé tæp 25 prósent.

Preben Jensen forstjóri Jeva í Danmörku kom af fjöllum þegar fréttastofa hafði samband við hann í morgun. Hann sagðist ekki hafa vitað að töskurnar væru svona dýrar hér á landi. Hann sagði dæmi um að Íslendingar hefðu samband við sig til að kaupa töskurnar beint frá Jeva í Danmörku en enn sem komið er væri það ekki hægt. Það stæði þó til bóta. Jensen sagðist vera að athuga hvernig hann gæti selt til Íslands til dæmis í gegnum netverslun sína og að það myndi skýrast á næstu dögum hvort af yrði.