Byggja hátt í 200 hús og þjónustumiðstöð í Lettlandi

Athafnamaðurinn Þorsteinn Steingrímsson, ásamt tveimur öðrum íslenskum fjárfestum, er nú að byggja hátt í 200 einbýlis og raðhús ásamt þjónustumiðstöð í Riga höfuðborg Lettlands. Þorsteinn segir að þeir hafi fengið 20 hektara landi úthlutað undir þessar framkvæmdir í einu af úthverfum borgarinnar.

"Þetta var tækifæri sem barst okkur og við ákváðum að slá til," segir Þorsteinn Steingrímsson í samtali við vísir.is. "Það er ekki eins mikill sósialismi í skipulagsmálum þarna og er hér heima og því höfum við þegar hafist handa. Jarðvinna og undirbúningur er kominn á fullt og fyrstu húsin mun rísa í febrúar á næsta ári."

Þorsteinn segir að mikill skortur sé á húsnæði í borginni og því töluverður áhugi meðal heimamanna að kaupa þessi hús sem þeir félagar eru að fara að byggja. "Svipað og í öðrum fyrrum austantjaldslöndum mega menn búa þröngt þarna en það eru að meðaltali aðeins sjö til átta fermetrar af húsnæði til undir hvern íbúa borgarinnar," segir Þorsteinn.