Vel mætt á kertafleytingu

Mjög góð stemning er við Tjörnina í Reykjavík að sögn aðstandenda kertafleytingar sem ætlað er að minnast þess þegar kjarnorkusprengjum var varpað á japönsku borgirnar Hiroshima og Nagasaki.

Stefán Pálsson, formaður Samtaka íslenskra herstöðvarandstæðinga, segist ánægður með mætinguna. Hann giskar á í fljótu bragði að um 2000 manns hafi lagt leið sína niður að Tjörninni til að taka þátt í minningarathöfninni.

Stefán segir að athöfnin hafi verið haldin á Tjörninni allar götur síðan 1985, þegar 40 ár voru liðin frá árásunum. Stefán var tíu ára þegar hann mætti í fyrstu athöfnina og hann segist ávallt hafa mætt þegar hann hefur átt þess kost. „Ætli þau séu ekki tvö eða þrjú skiptin sem ég hef forfallast," segir Stefán.