Mikill meirihluti kvenna fær of litla fólínsýru

Líkur á brjóstakrabbameini minnka um nærri helming hjá konum ef þær neyta mikillar fólínsýru eða borða nóg af fólasínríku fæði. Þetta sýnir ný og umfangsmikil rannsókn sænskra vísindamanna. Rannsóknin sýnir að mikill meirihluti kvennanna borðar of lítið af fólasíni.

Sænskir miðlar greina frá rannsókninni í dag. Fylgst var með um tólf þúsund konum yfir fimmtugu á tíu ára tímabili og á þeim tíma fengu 400 kvennanna brjóstakrabbamein. Rannsóknin leiddi einnig í ljós að fimmta hver kona neytir nægilega mikið af fólasíni sem samkvæmt lýðheilsuyfirvöldum í Svíþjóð eru 300 míkrógrömm á dag. Það þýðir að 80% kvennanna fengu ekki nóg af fólasíni.

Hjá Lýðheilsustöðinni á Íslandi fengust þær upplýsingar að fólasín sé einkum að finna í grænmeti, sumum tegundum ávaxta, hnetum og vítamínbættu morgunkorni. Meðal annars í rauðri papriku, spínati, brokkolí, jarðarberjum, appelsínum og Cheeriosi svo eitthvað sé nefnt.

Ráðlagður dagskammtur hér er talinn 300 míkrógrömm á dag, eins og í Svíþjóð, og að mati sænsku vísindamannnanna þarf ekki mikið meir til að draga úr líkum á brjóstakrabbameini. Dagsskammturinn næst til dæmis með um einni og hálfri skál af Cheeriosi. Of stór skammtur þykir þó ekki æskilegur. Ófrískum konum hefur samt verið ráðlegt að borða fólasínríka fæðu, helst um 500 mikrógrömm á dag til að koma í veg fyrir fósturskaða.

Það voru sérfræðingar við Háskólann í Lundi sem unnu rannsóknina en niðurstöður hennar er að finna í nýjasta hefti tímaritsins American Journal of Clinical Nutrition. Hins vegar eru ekki allir á eitt sáttir um virkni vítamínsins því aðrar rannsóknir hafa sýnt að það auki hættuna á annars konar krabbameini.