Hálslón að fyllast

Ekki er búist að Hálslón verði fullt fyrr enn skömmu áður en raforkuframleiðsla á að hefjast í október. Aðeins vantar rúma tíu metra upp á að lónið verði fullt en forsvarsmenn Kárahnjúkavirkjunar hyggjast stýra streyminu síðustu metrana vegna frágangsvinnu sem eftir er á yfirfalli Kárahnjúkastíflu.

Tæpt ár er síðan tappinn var settur í Hálslón og það fór að fyllast. Áætlað var að það hefði náð fullri hæð í lok ágúst og yrði þá 625 metra yfir sjávarmáli. Hins vegar hafa hlýindi í sumar gert það að verkum að safnast hefur hraðar í lónið en áætlar var.

Við hönnun Kárahnjúkastíflu var gert ráð fyrir að Hálslón fylltist á tilteknum hraða og til þess að draga úr fyllingingarhraðanum gripu Landsvirkjunarmenn til þess ráðs að opna botnrás stíflunnar og hleypa þar vatni út. Aðeins hefur kólnað á svæðinu síðastliðna viku og því er botnrásin nú opin til hálfs.

Hæð lónsins var í gær um 614 metrar yfir sjávarmáli og því vantar aðeins rúma 10 metra upp á að það verði barmafullt. Sigurður Arnalds, talsmaður Kárahnjúkavirkjunar, segir að samkvæmt áætlunum eigi lónið að ná 623 metra hæð í byrjun september en síðustu tvo metrana á að geyma í rúman mánuð vegna frágangsvinnu sem eftir er á yfirfalli Kárahnjúkastíflu.

Sigurður reiknar með að Hálslón verði orðið barmafullt seinni partinn í október eða skömmu áður en raforkuframleiðsla hefst. Í fullri stærð þekur Hálslón 57 ferkílómetra svæði og er því svipað að stærð og Lögurinn við Egilsstaði.