Mannlíf með besta móti á útihátíðum

Neistaflug fer nú fram í Neskaupstað.  Tveir dansleikir voru í bænum í nótt, og fóru þeir að mestu vel fram samkvæmt upplýsingum frá lögreglu.  Nokkur erill hefur verið hjá lögreglu í tengslum við ölvun hátíðargesta en lagt var hald á talsvert af áfengi sem unglingar á svæðinu höfðu í fórum sínum.

Að sögn Guðmundar R. Gíslasonar, talsmanns Neistaflugs, hefur fjölskyldudagskrá gengið afar vel í dag, mikið er af barnafólki í Neskaupsstað og íþróttamót hafa verið mjög vel sótt.

Hljómsveitin Buff mun leika fyrir dansi í íþróttahúsinu í kvöld en veður hefur verið ágætt í Neskaupsstað og betra en spár lofuðu.

Ökumaður var tekinn fyrir ölvun við akstur í umdæmi lögreglunnar eystra en á þriðja tug ökumanna hafa verið kærðir fyrir of hraðan akstur frá því í gær.

Það er sjálfsagt að minna ökumenn á að viðurlög við hraðakstri hafa verið hert verulega. 

Lögreglan telur að þessi fyrsta nótt Neistaflugs hafi farið vel fram en Lögreglan treystir sér ekki til að meta fjölda hátíðargesta.

Á Akureyri hefur mannlífið verið með besta móti. Fjöldi fólks er saman kominn á tveimur tjaldsvæðum í bænum, annars vegar við Þórunnarstræti og hins vegar við Hamra nálægt Kjarnaskógi.  Aldurstakmark er á báðum tjaldsvæðum bundið við 23 ár og var það gert til að stemma stigu við ólátum.

Þar var allt rólegt í nótt og í dag á Akureyri að sögn lögreglu og segir hún að mikill munur sé á þessari verslunarmannahelgi og hinum síðustu.

Unglingamót UMFÍ er á Höfn í Hornafirði um helgina þar sem eru um átta þúsund manns og hefur hátterni gesta verið til fyrirmyndar að sögn lögreglu. 

Af öðrum útihátíðum má nefna Síldarævintýrið á Siglufirði, Sæludaga í Vatnaskógi og Fjölskyldufjör á Úlfljótsvatni.