Umferðarstofa biður bílstjóra að gæta vel að mótorhjólamönnum

Umferðarstofa vill benda bílstjórum á að gæta sérstaklega vel að mótorhjólamönnum í umferðinni um helgina. Mótorhjól sjást ekki eins vel og bíll. Þau eru smærri og sýnast oft fjær en raun ber vitni. Umferðarstofa brýnir fyrir ökumönnum að gá að minnsta kosti tvisvar áður en ekið er af stað á gatnamótum. "Það er ekki nóg að gá - þú verður að sjá!," segir í tilkynningu frá Umferðarstofu.

Umferðarstofa hvetur einnig mótorhjólamenn til að fara sér hægt nú um stundir vegna hvassviðris. Búist er við töluverðri umferð mótorhjólamanna um helgina.