Íslensk stúlka í róðrarliði Oxford

Íslensk stúlka, Margrét Helga Ögmundsdóttir doktorsnemi í lífefnafræði við Oxford háskóla hefur verið valin í úrvalslið skólans í róðri, aðeins hálfu ári eftir að hún hóf æfingar. Í tilkynningu frá Oxbridge, hollvinasamtökum Oxford og Cambridge á Íslandi, segir að róðrarlið Oxford háskóla sé eitt hið þekktasta í heimi. Liðið mun yfirleitt vera skipað landsliðsmönnum og Ólympíuförum, en 150 ára hefð er fyrir róðrarkeppni Oxford og Cambridge.

„Innan Oxford háskóla eru 39 garðar sem flestir hafa á að skipa eigin róðrarliðum," segir í tilkynningunni. „Margrét Helga vann sér öruggt sæti í liði síns garðs, Christ Church, fljótlega eftir að hún hóf að æfa róður og eftir gott gengi með liðinu og að lokinni undankeppni var Margrét valin til að æfa með úrvalsliði skólans tæpum sex mánuðum eftir að hún réri fyrst," segir ennfremur. Þá er þess getið að Margrét hafi lítið þekkt til íþróttarinnar áður en hún hóf nám við Oxford að undanskildu því að unnusti hennar hafi róið fyrir Harvard háskóla á sínum tíma.