Teljur tjón vegna vatnslekans ekki mikið

Ekki er talið að tjón vegna vatnslekans í Rúmfatalagernum sé mikið. Fjármálastjóri verslunarinnar segir aðalleg um skemmdir á gólfi að ræða en að vörur í versluninni hafi sloppið að mestu. Slökkvilið höfuðborgarsvæðisins vinnur nú í því að dæla vatni úr versluninni og á öðrum svæðum við Smáratorg. Úðarakerfi bilaði eftir að vatn var tekið af Smáratorginu án þess að rekstraraðilar voru látnir vita.

„Útlitið er gott miðað við aðstæður og skemmdir minni en við óttuðumst, " sagði Þorsteinn Þorsteinsson, fjármálastjóri Rúmfatalagersins, í samtali við Vísi. „Þetta eru aðallega skemmdir á vörum inni á lager en vörur í versluninni virðast hafa sloppið."

Úðarakerfi í lager Rúmfatalagersins við Smáratorg bilaði í nótt með þeim afleiðingum að það fór í gang. Starfsmenn verslunarinnar urðu fyrst varir við lekann þegar þeir mættu til vinnu í morgun.

Að sögn Þorsteins var allt vatn tekið af Smáratorginu í nótt vegna framkvæmda við nýbyggingar á svæðinu. Rekstraraðilar í Smáratorginu voru hins vegar ekki látnir vita. Þegar þrýstingur var settur á að nýju er talið að úðarakerfi hafi farið af stað með fyrrgreindum afleiðingum.

Þorsteinn segir það mikil mildi að úðarakerfi inni í versluninni sjálfri hafi ekki farið í gang heldur aðeins inni á lagersvæði. Hann segir vörutjón talið í hundruðum þúsunda króna. „Við stefnum að því að opna aftur í dag. Það þarf að hreinsa teppið í versluninni en öðru leyti virðist tjónið vera óverulegt. Hins vegar er ljóst að þeir hefðu átt að láta okkur vita áður en þeir tóku vatnið af."

Samkvæmt upplýsingum frá slökkviliði höfuðborgarsvæðisins lak vatn yfir 1.000 til 1.500 fermetra gólflöt í verslunar- og þjónusturými við Smáratorgið.

Auk Rúmfatalagersins lak vatn einnig inn í húsnæði Læknvaktarinnar og verslun Elko. Slökkviliðsmenn eru enn á svæðinu að dæla vatni.