Síðustu árgangar af þorski lélegir

Mikið af þorski sem sjómenn verða varir við um allan sjó eru góðir árgangar frá því fyrir aldamót, segir Jóhann Sigurjónsson, forstjóri Hafrannsóknarstofnunar. Árgangarnir sem eftir koma eru allir lélegir, segir hann.

Kolsvört veiðiráðgjöf Hafró hefur verið á skjön við reynslu sjómanna sem hafa á vormánuðum verið í vaðandi þorskfiskiríi Þetta er fiskur úr meðalstórum árgöngum frá því fyrir aldamót - segir forstjóri Hafró en útlitið er dökkt. Allir árgangar frá aldamótum eru lélegir.

Jóhann telur að það verði að byggja upp hrygningarstofn þorsksins og minnka veiðina - annars blasi við að þorskstofnin dali áfram. Meginskýringin á því að þorskstofninn minnkar og minnkar er veiði umfram ráðgjöf. segir Jóhann. Þessi umframveiði nemi yfir milljón tonnum á frá því kvótakerfið var sett á fyrir aldarfjórðungi.

En það að er víðar en hér sem varað er við ofveiði - þó það skjóti nokkuð skökku við að fá, ef nokkur dæmi eru til um að friðun hafi byggt upp fiskistofn. Jóhann staðfestir að það geti vel verið að fá dæmi séu um slíkt.

Það hefur verið fullyrt, meðal annars af Jóni Kristjánssyni fiskifræðingi að það eigi ekki að friða horaðan og svangan fisk. Þvert á móti eigi að veiða hann svo hann éti ekki seiði og smáfisk úr eigin stofni. Hafró hafnar algjörlega þessari grisjunarkenningu. Jóhann bendir á að þó svo æti sé af skornum skammti geti þorskurinn tórt lengi en sé síðan skjótur að bæta við þyngd sína um leið og aðstæður batni.

Löndunartölur eru ein af grunnstoðum í stofnmati - og þar með veiðiráðgjöf Hafró. Ekki er reiknað með neinu svindli með löndun framhjá vikt eða öðrum hætti í útreikningum Hafró enda segir forstjóri stofnunarinnar að það skipti ekki meginmáli. Vandamál myndi skapast ef svindlið væri breytilegt frá ári til árs. Ef svindlið, þó það sé stórfellt, sé alltaf það sama hafi það ekki áhrif á stofnmat.