Sorg og sársauki eftir mikið brunaslys

Sautján ára gamall Hafnfirðingur sem fékk þriðja stigs bruna á 60 prósent líkamans eftir sjóðandi sturtu, segist vonast til að tilfelli eins og hans verði til að bjarga öðrum frá því sama. Ár er liðið frá slysinu og hann segir sorgina og sársaukann hafa verið óbærilegan.

Hjörtur Kristjánsson var að undirbúa sinn fyrsta vinnudag í sumarvinnu hjá Bónus þegar hann varð undir sjóðandi heitri sturtu. Foreldrar hans vöknuðu við læti af baðherberginu og komu að honum þar. Hjörtur fór í tvær stórar aðgerðir strax á eftir og var haldið sofandi í öndunarvél í 34 daga. Þegar hann vaknaði mundi hann ekkert hvað hafði gerst þar sem hann fékk flogakast á sama tíma og hann steig í sturtuna.

Hjörtur var í toppformi fyrir slysið, en fór niður undir anorexíumörk og var einungis 47 kíló þegar hann var léttastur. Hann svaf illa og átti erfitt með að halda næringu niðri. Það eina sem hann gat gert var að ýta á takka. Hann gat ekki einu sinni borðað.

Þrátt fyrir sorgina og sársaukann síðasta árið segir Hjörtur að hann líti jákvætt á þessa lífsreynslu og hann muni læra af henni. Og framtíðaráform eru ekki ákveðin.

Húð Hjartar mun aldrei verða eins og hún var áður og hann mun bera ör um allan líkamann. Læknar segja að tíminn muni leiða í ljós hversu vel húðin nær að gróa, en það komi fyrst í ljós eftir rúmt ár. Þangað til á Hjörtur eftir að fara í nokkrar minniháttar aðgerðir.