Ingibjörg Sólrún á fundi utanríkisráðherra Norðurlanda

Ingibjörg Sólrún Gísladóttir, utanríkisráðherra, sat í dag fund utanríkisráðherra Norðurlandanna í Helsinki, en Finnar gegna formennsku í norrænu ráðherranefndinni um þessar mundir, segir í fréttatilkynningu frá utanríkisráðuneytinu

Ingibjörg leiddi á fundinum umræður um loftslagsmál. Viðstaddir ráðherrarnir voru sammála um að Norðurlöndin ættu að beita sér fyrir því að raunhæf og metnaðarfull niðurstaða náist á ráðherrafundi Loftslagssamningsins í Kaupmannahöfn 2009. Ráðherrarnir ræddu einnig um svæðisbundið samstarf, svo sem norðurslóðamál og hvernig efla megi vettvang Eystrasaltsráðsins. Þá voru rædd málefni Balkanskaga, einkum staða Kósóvó, alvarlegt ástand mála fyrir botni Miðjarðarhafs og neyðarástandið í Darfúr.

Fyrir fundinn kynnti Ingibjörg sér starfsemi íslenskra fyrirtækja í Finnlandi og undirbúning stofnunar Finnsk-íslenska viðskiptaráðsins í Helsinki þann 20. júní n.k. Ráðherra heimsótti útibú Kaupþings í Finnlandi og aðalskrifstofur Norræna fjárfestingarbankans.

Að fundi loknum átti ráðherra fund með finnskum starfsbróður sínum, Ilkka Kanerva, og ræddu þau samskipti ríkjanna, m.a. viðskipti og fjárfestingar. Þau ræddu einnig samstarf Norðurlandanna á vettvangi Sameinuðu þjóðanna og framboð ríkjanna til öryggisráðs Sameinuðu þjóðanna. Ísland er í framboði til öryggisráðsins fyrir tímabilið 2009-2010 en Finnland fyrir tímabilið 2013-2014. Rætt var um helstu áherslur landanna og hvernig þau geta unnið saman á vettvangi öryggisráðsins. Öll Norðurlöndin vinna saman að því markmiði að Ísland og Finnland nái kjöri til öryggisráðsins fyrir ofangreind tímabil og líta á framboðin sem norræn framboð.