Sumarið kemur seinna

Það er í alvörunni 22. maí. Samkvæmt dagatalinu allavega

Þeim sem þurftu að skafa af bílum sínum í morgun væri þó fyrirgefið að halda að þeir hafi tekið feil á dagsetningunni.

Í gær börðust sól, hagl, rigning, snjókoma og hávaðarok um athygli veðurbarinna landsmanna. Hálkan kom mönnum í opna skjöldu og skautuðu nokkrir bílar út af Reykjanesbrautinni, en sem betur fer slasaðist enginn alvarlega.

Sigurður Þ. Ragnarsson veðurfræðingur segir þetta veður eðlilegt á þessum árstíma og að það ætti ekki að koma neinum á óvart. Lægð, ættuð frá Grænlandi sé sunnan við land og sjái okkur fyrir þessu huggulega vorveðri. Kalt sé í háloftunum og í hvössu veðri falli snjókorn hratt niður úr háum éljaklökkum og nái því ekki að bráðna. Því snjói í fimm stiga hita eins og gerst hefur síðustu daga.

Sigurður segir að sumarið sé væntanlegt um eða uppúr næstu helgi, en þangað til má búast við svipuðu veðri.