Tvö stór mál enn ófrágengin á milli flokkanna

Forystumenn flokkanna funduðu á Þingvöllum til klukkan ellefu í gærkvöldi og komust þeir langt með málefnasamning. Samkvæmt heimildum Stöðvar 2 eru þó tvö stór mál enn ófrágengin í viðræðum flokkanna en ekki fékkst uppgefið hvaða mál það eru.

Ingibjörg Sólrún Gísladóttir mætti á skrifstofu Samfylkingarinnar í morgun en stefnt er að því að viðræðum flokkanna verði fram haldið eftir hádegi. Eftir því sem næst verður komið er ekki byrjað að ræða við einstaka þingmenn um ráðherraskipan.

Þá er ekki búið að boða fundi þingflokka né flokksráð Sjálfstæðisflokks og flokksstjórn Samfylkingarinnar sem eru þær stofnanir flokkanna sem þurfa að samþykkja stjórnarmyndun.