Reyndu að senda inn framboð eftir að frestur rann út

Baráttusamtökin náðu aðeins að skila inn framboðslista fyrir komandi alþingiskosningar í einu kjördæmi áður en framboðsfrestur rann út á hádegi í dag. Samtökin gerðu hins vegar tilraun til að skila inn framboðum í hinum fimm kjördæmunum eftir að fresturinn rann út. Alls bjóða sex flokkar fram á landinu öllu en tæplega átta hundruð einstaklingar eru í framboði.

Framboðsfrestur vegna þingkosninganna sem fram fara 12. maí næstkomandi rann út á hádegi í dag. Skila þurfti inn framboðum til yfirkjörstjórna í hverju kjördæmi fyrir sig. Alls skiluð sex framboð inn listum í öllum sex kjördæmunum: Framsóknarflokkurinn, Frjálslyndi flokkurinn, Íslandshreyfingin, Samfylkingin, Sjálfstæðisflokkurinn og Vinstrihreyfingin - grænt framboð. Baráttusamtök eldri borgara og öryrkjar náðu aðeins að skila inn framboði í einu kjördæmi áður en að fresturinn rann út, Norðausturkjördæmi. Alls eru tæplega áttahundruð manns á þrjátíu og sjö listum sem skilað var inn í dag.

Baráttusamtökin höfðu boðað framboð í öllum kjördæmum en buðu aðeins fram í einu eins og áður sagði. Þegar fréttastofa hafði samband við Arndísi Björnsdóttur, talsmann Baráttusamtakanna, eftir að klukkan sló tólf í dag sagði hún Baráttusamtökin vera með framboðslista og undirskriftir meðmælenda vera tilbúið í öllum hinum fimm kjördæmunum. Tölvuvandræði og veikindi sín hafi orðið til þess að henni seinkaði að skila inn framboðunum.

Arndís fór ásamt öðrum meðlimi Baráttusamtakanna í dómsmálaráðuneytið upp úr hálf eitt í dag til að reyna að athuga hvort hún gæti skilað framboðunum inn. Þar fékk hún þau svör að hún þyrfti að leita til formanns hverrar yfirkjörstjórnar fyrir sig. Arndís fór því næst á skrifstofu formanns yfirkjörstjórnar í Reykjavíkurkjördæmi norður. Þar sem hún afhenti framboð Baráttusamtakanna í Reykjavíkurkjördæmi norður, tveimur og hálfum tíma eftir að framboðsfrestur rann út.

Arndís vonaðist til að sérstökum aðstæðum yrði sýndur skilningur og þeim leyft að bjóða sig fram. Formaður yfirkjörstjórnar í Reykjavíkurkjördæmi norður sagði að málið yrði tekið fyrir í yfirkjörstjórn í dag eða á morgun.

Yfirkjörstjórnir munu hittast um helgina til að fara yfir alla þá framboðslista sem bárust í dag og kanna hvort þeir uppfylli öll skilyrði sem í gildi eru.