Vildi hætta viðskiptum við Nordica

Árni Pétur Jónsson, forstjóri Teymis og fyrrverandi yfirmaður matvörusviðs Baugs, sagðist í héraðsdómi í dag hafa viljað hætta viðskiptum við Nordica árið 2002. Hann var ósáttur við að Tryggvi Jónsson, fyrrverandi aðstoðarforstjóri Baugs, hefði þrýst á innkaupaaðila að eiga viðskipti við tiltekna aðila, eins og Nordica, þrátt fyrir að vörur frá fyrirtækinu seldust ekki vel.

Árni Pétur var spurður ítarlega út í birgðamál Baugs í tengslum við 15. ákærulið endurákærunnar en þar er Jóni Ásgeir Jóhannessyni, forstjóra Baugs, og Tryggva Jónssyni, fyrrverandi aðstoðarforstjóra, gefið að sök meiri háttar bókhaldsbrot með því að hafa fært tilhæfulausan kreditreikning frá Nordica upp á tæpar 62 milljónir í bókhald Baugs. Jóni Gerald er gefið að sök að hafa aðstoðað þá við brotið með því að gefa reikninginn út sumarið 2001.

Árni Pétur sagði að frá því að hann hefði tekið við stöðu yfirmanns matvörusviðs hefði hann haft efasemdir um viðskiptin við Nordica og að hann hefði viljað komast í bein samskipti við birgja í Bandaríkjunum í stað þess að hafa samskipti við þá í gegnum Nordica. Um mitt ár 2001 hefði hann látið Jón Gerald og Tryggva vita að viðskipti Baugs við Nordica yrðu líklega um tvær milljónir dollara á árinu enda hefðu þau numið rúmri milljón dollara á fyrri hluta ársins. Hins vegar hefði hann komist að því þegar hann skoðaði birgðastöðu betur að mikið væri af birgðum frá Nordica hjá Baugi miðað við stærð Nordica sem birgis.

Í nóvember hefði svo komið í ljós að viðskipti Nordica og Baugs myndu ekki ná tveimur milljónum dollara eins og stefnt var að en Tryggva og Jóni Gerald hefði greint á um það hvort um loforð um tveggja milljóna viðskipti var að ræða eða markmið. Jón Gerald hefði svo viljað fá greiðslu fyrir mismuninum á raunverulegum viðskiptum Baugs og tveggja milljóna króna markinu en við því hefði Baugur ekki orði.

Árni Pétur sagði að snemma árs 2002 hefði hann lagt áherslu á að ljúka viðskiptum við Nordica en þó á sem mýkstan hátt þannig að allir aðilar hlytu af því sem minnstan skaða, þar á meðal Jón Gerald. Hins vegar hefði Jón Gerald viljað halda viðskiptunum áfram og hefði nokkrum sinnum komið til hvassra orðaskipta milli þeirra vegna málsins.

Í kjölfarið hefðu öll samskipti við Nordica þyngst og ýmis leiðindamál komið upp og undið upp á sig. Vísaði hann meðal annars til símtals milli sín og Jóns Geralds þar sem Jón Gerald hefði verið mjög reiður. Hann hefði sagt að hann gæti valdið Baugi þvílíkum skaða að Baugsmenn myndu ekki trúa því.

Árni Pétur var einnig spurður út í kreditreikninginn sem ákært er fyrir en sagðist fyrst hafa heyrt af honum í fjölmiðlum. Hann vissi því ekkert um tilurð hans. Hins vegar sagði hann að ekki væri óeðlilegt að viðskipti við birgja væru meðhöndluð á þennan hátt.

Bjarni Ármannsson, forstjóri Glitnis, bar einnig vitni í málinu en forveri Glitnis, Íslandsbanki-FBA, kom að hlutfjárútboði Baugs síðla árs 2000 sem getið er í nokkrum ákæruatriðum. Þar er Jóni Ásgeiri Jóhannessyni gefið að sök að hafa hlutast til um lán frá Baugi til Gaums, Fjárfars og Kristínar Jóhannesdóttur til kaupa á hlutabréfum í Baugi. Sagðist Bjarni ekki muna í smáatriðum eftir þessu útboði.

Bjarni sagði að ákveðið hefði verið að Baugur fengi þóknun fyrir sölu á hlutabréfum í Baugi frá FBA og Kaupþingi til Reitangruppen í Noregi. Var það í tengslum við spurningar um 12. ákærulið sem lýtur að meintri tilhæfulausri bókhaldsfærslu upp á rúmar 13 milljónir króna en Jón Ásgeir Jóhannesson hefur skýrt hana sem þóknun fyrir milligöngu í hlutabréfaviðskiptunum.

Þá sagðist Bjarni kannast við að við stofnun Baugs árið 1998, sem bankinn kom að, hefði verið samið um að æðstu stjórnendur fengju kaupréttarsamninga að hlutabréfum í Baugi.

Fimm önnur vitni voru yfirheyrð í dag, þar á meðal Guðmundur Marteinsson, framkvæmdastjóri Bónuss. Vitnaleiðslur halda áfram á morgun en þá koma meðal annars fyrir dóminn Sigurður Einarsson, stjórnarformaður Kaupþings, og Hreiðar Már Sigurðsson, forstjóri bankans.