Þúsundir streyma á hátíðar

Þúsundir Íslendinga streyma nú á hátíðar sem haldnar eru víða um land um helgina. Straumurinn þetta árið virðist liggja til Vestmannaeyja og Akureyrar. Umferðin hefur verið að þyngjast út úr höfuðborginni eftir því sem liðið hefur á daginn.

Umferðin hefur að mestu gengið vel. Lögreglan er mikið eftirlit um helgina og verður vel fylgst með ökumönnum um allt land. Lögreglumenn munu meðal annars fylgjast með umferð úr þyrlu Landhelgisgæslunnar.

Fjöldi fólks er nú þegar kominn á Þjóðhátíð í Vestmannaeyjum en fyrr í dag taldi þjóðhátíðarnefnd að fjöldi gesta á svæðinu væri um fimm þúsund.

Þjóðhátíðargestir hafa frá því í gær streymt til Vestmannaeyja. Mikil ölvun var í bænum í nótt og þurfti lögreglan að hafa afskipti af þó nokkrum. Fangageymslur voru fullar í Eyjum í nótt en öllum var sleppt í morgun. Tvö fíkniefnamál komu upp í gær og í nótt. Einn var tekinn með hass þegar hann kom úr Herjólfi og annar með e-töflur inni í Herjólfsdal. Bðir voru með lítilræði af efnum á sér. Lögreglan hafði einnig hendur í hári tveggja fimmtán ára ölvaðra pilta sem stálu sendibifreið og enduðu utanvegar. Tuttugu og fimm lögreglumenn eru að störfum í bænum um helgina en sjö þeirra fást eingöngu við fíkniefnamál og hafa þeir þrjá fíkniefnahunda.

Hvasst var í dalnum í gær og var bannað að tjalda þar vegna veðurs. Íþróttahús bæjarins var opnað og gistu þjóðhátíðargestir þar í nótt. Setja átti hátíðina formlega í klukkan hálf þrjú í dag en setningunni var frestað um til klukkan fjögur. Um það leiti fóru margir að tjalda

Þeirsem ætla á þjóðhátíð en hafa hvorki tryggt sér flug eða pláss í Herjólfi gætu lent í vandræðum. Nær uppselt er í öll flug til og frá Eyjum um helgina en flug hefur gengið vel það sem af er degi.

Hátíðar eru víðar en í Vestmanneyjum um helgina á Akureyri er Ein með öllu, á Siglufirði Síldarævintýrið, Neistaflug er á Neskaupsstað, Unglingamót UMFÍ er á Höfn í Hornafirði, Sæludagar í Vatnaskógi, Fjölskyldufjör á Úlfljótsvatni og Innipúkinn í Reykjavík svo eitthvað sé nefnt.

Fyrir þá sem enn hafa ekki ákveðið hvert halda skal um helgina er gott að hafa í huga að spáð er bjartasta veðrinu á Suðurlandi en blautast verður á Norðurlandi. Vindasamt verður á öllu landinu.