Tvö þúsund manns fljúga frá Reykjavík í dag

Flug hefur gengið vel það sem af er degi. Fimm ferðir hafa verið farnar til Vestmannaeyja, fimm á Akureyri, þrjár á Egilsstaði og tvær á Ísafjörð, segir Árni Gunnarsson, framkvæmdastjóri Flugfélags Íslands.

Árni segir að í dag séu tæplega 2000 farþegar bókaðir í flug með félaginu. Hann segir að flestir séu á leið til Akureyrar og Vestmannaeyja en einnig séu áætlaðar 3 ferðir til Ísafjarðar og 6 ferðir til Egilsstaða.

Árni segir að í heildina verði um 6000 farþegar á flugi með Flugfélagi Íslands um helgina. Alls verði um 30 flugmenn að fljúga í um 200 flugum. Stærsti einstaki dagurinn verði á mánudag en þá séu áætlaðar 16 ferðir frá Vestmannaeyjum. Gert er ráð fyrir að tæplega 800 farþegar verði fluttir frá Eyjum þann dag.