Meistarinn rukkaður fyrir rausnarskapinn

Jónas Örn Helgason, fyrsti sigurvegari spurningakeppninnar „Meistarinn" á Stöð 2, vakti athygli eftir keppnina þegar hann ákvað að gefa hluta verðlaunaupphæðarinnar til góðgerðamála. Hann afhenti Hjálparstarfi kirkjunnar og Rauða krossi Íslands 500 þúsund króna framlag til hjálparstarfs samtakanna á Indlandi og í Afríku. Það kom Jónasi hins vegar á óvart nú um mánaðarmótin að Skattstjórinn í Reykjavík innheimtir 200 þúsund krónur í skatt af gjöf Jónasar.

Faðir Jónasar, Helgi Árnason, sagði í samtali við Vísi að í bréfi frá skattstjóranum komi fram að lagaheimild skorti til „fjárdráttar frá styrkjum og starfstengdum greiðslum," eins og það er orðað í bréfinu. Ef Jónas hefði haft rekstur með höndum hefði hann hins vegar haft fullan rétt á því að draga upphæðina frá skatti.

„Jónas Örn á því enga undankomuleið með að borga um 40 prósent skatt af gjöfinni," segir Helgi. Hann segir ennfremur að Jónas hafi velt því fyrir sér í fullri alvöru á sínum tíma að gefa allt verðlaunaféð til hjálparstarfs, alls fimm milljónir króna. Hann hefði því líklega orðið að gjalda fyrir þann rausnarskap með því að borga tvær milljónir til ríkissjóðs.