Benedikt Erlingsson senuþjófurinn á Grímunni

Leiksýningin Dagur vonar eftir Birgi Sigurðsson var valin besta leiksýning ársins á Grímunni, íslensku leiklistarverðlaununum, í gærkvöldi. Besta leikkona í aðalhlutverki var valin Sigrún Edda Björnsdóttir fyrir hlutverk sitt í þeirri sýningu.

Senuþjófur kvöldsins var þó Benedikt Erlingsson sem hlaut flest verðlaun, alls þrjú, í flokkunum: leikstjórn ársins fyrir leiksýninguna Ófagra veröld, en leikari ársins og leikritaskáld ársins fyrir verkið Mr. Skallagrimsson.

Besta leikkona í aukahlutverki var valin Charlotte Bøving en Þröstur Leó Gunnarsson fékk Grímuna sem besti leikari í aukahlutverki.

Barnasýning ársins var valin Abbababb en útvarpsverk ársins var Harún og sagnahafið.

Erna Ómarsdóttir var valin dansari ársins og hún varð einnig valin danshöfundur ársins ásamt Margréti Söru fyrir Mysteries of Love.

Bjarni Thor Kristinsson var valin söngvari ársins en tónlist ársins var leikin af hljómsveitinni Flís.

Lýsingarverðlaun ársins hreppti Halldór Örn Óskarsson, verðlaun fyrir bestu leikmynd fékk Grétar Reynisson en Þórunn Elísabet Sveinsdóttir hlaut Grímuna fyrir búninga.

Sérstök heiðursverðlaun fengu að þessu sinni þau Herdís Þorvaldsdóttir og Róbert Arnfinnsson.