Ekkert spurst til brottrekna Rússans

Ekkert hefur spurst til rússneska mannsins sem rekinn var úr landi í síðustu viku. Eiginkona hans óttast að hann verði settur í fangelsi í Rússlandi þar sem hann er frá Tjetjeníu. Lögreglan meinaði henni að kveðja hann á Leifsstöð.

„Ég hef ekkert heyrt í honum," sagði Julia Zacharova í samtali við Vísi. Julia er eiginkona Ruslan Bogaeira sem rekinn var úr landi á miðvikudaginn í síðustu viku. „Ég hef heldur ekki fengið neinar upplýsingar um afdrif hans frá yfirvöldum hér heima eða í Rússlandi."

Ruslan Bogaeira var rekinn úr landi á miðvikudaginn í síðustu viku og hann sendur til Rússlands. Bogaeira var veitt bráðarbirgðardvalarleyfi hér á landi árið 2005. Leyfið gilti til 13. október næstkomandi af því gefnu að hann yrði ekki rekinn úr landi fyrir þann tíma. Að sögn Juliu var Ruslan með atvinnu hér á landi og einnig kominn með kennitölu.

Í samtali við Vísi í síðustu viku sagðist Julia óttast um afdrif Ruslan þar sem hann er frá Tjetjeníu. Óttaðist hún að hann yrði settur beint í fangelsi við komuna til Rússlands. Sjálfur bað Ruslan íslensk yfirvöld um að senda hann eitthvert annað en til Rússlands. Lögreglan meinaði Juliu að kveðja eiginmann sinn á Leifsstöð og fékk hún ekki aðrar skýringar frá lögreglumönnum en að það væri einfaldlega ekki hægt.

Samkvæmt upplýsingum frá ríkislögreglustjóra var manninum vísað úr landi að beiðni Útlendingarstofnunar. Þar fengust þau svör að ekki væri rætt um einstök tilfelli.