Formaður Vinstri-Grænna vill fund í utanríkisnefnd

Steingrímur J. Sigfússon, formaður Vinstri-grænna, og fulltrúi flokksins í utanríkismálanefnd fer fram á fund í nefndinni við fyrsta tækifæri og vill að utanríkisráðherra og helstu sérfræðingar utanríkisráðuneytisins verði kvaddir til fundarins. Á dagskrá fundarins verði staða öryggismála og þá sérstaklega nýtt hlutverk Nató í svokölluðum loftvörnum landsins, framtíðarrekstur ratsjárstöðvakerfisins og skuldbindingar og líklegur kostnaður Íslands þessu tengdur.

Þá vill Steingrímur að á dagskrá fundarins verði heræfingarnar sem fyrirhugaðar séu í ágúst, tilhögun þeirra svo sem umsókn um lágflugsheimildir, og einnig þær skuldbindingar og sá kostnaður sem stjórnvöld hafi undirgengist fyrir Íslands hönd vegna nefndra heræfinga. Hann vill að gerð verði grein fyrir fjárheimildum sem til standi að nýta vegna ofangreindra útgjalda og einnig hvernig öllu undirbúnings- og ákvarðanatökuferli hafi verið háttað.