Hæst launaði opinberi starfsmaðurinn

Mikil ásókn fjármálafyrirtækja í sérhæft starfsfólk þrýstir launum millistjórnenda Seðlabankans upp, sem aftur hækkar laun Seðlabankastjóranna upp fyrir laun forsætisráðherra og forseta Íslands. Formaður bankastjórnar Seðlabankans verður með rúmt þingfrarakaup umfram forsætisráðherra í laun um næstu áramót og þar með hæst launaði opinberi starfsmaðurinn.

Útrás íslenskra fjármálafyrirtækja hefur leitt til mikillar eftirspurnar eftir sérhæfðu starfsfólki. Þannig eru þrír nýjir bankar komnir eða á leið á markaðinn, Icebank, Saga Capital og Askar Capital, sem eins og allir hinir bankarnir leita stöðugt að nýju starfsfólki. Þá er horft til Seðlabankans eins og annarra stofnana sem búa yfir hæfu starfsfólki.

Formaður bankaráðs Seðlabankans rökstyður nýlega ákvörðun um hækkun launa bankastjóranna um 200 þúsund krónur á mánuði með þessum þrýstingi, en í svari við fyrirspurn fréttastofunnar segir Helgi S. Guðmundsson formaður ráðsins:

Hörð samkeppni er um hæft starfsfólk á meðal fjármálastofnana sem kemur ekki á óvart eins hratt og umsvif íslenskra banka hafa vaxið. Afar mikilvægt er fyrir Seðlabankann að hafa jafnan í þjónustu sinni eins gott starfslið og völ er á og verður hann að taka mið af ríkjandi umhverfi til þess að svo geti verið.

Þessar hækkanir eru engu að síður í litlu samræmi við þróunina á almennum launamarkaði. Í jánúar 2005 hækkuðu laun bankastjóranna um 15 prósent og um 5% í jánúar 2006 og 2007. Ákvörðunin nú felur í sér 100 þúsund króna hækkun strax og aðra slíka hækkun hinn fyrsta janúar næst komandi.

Þá verða laun seðlabankastjóra eftirfarandi: Grunnlaun 1.409.535 og bankaráðsþóknun 110 þúsund, samtals 1.519.535 krónur. Davíð Oddsson seðlabankastjóri færri hærri laun sem formaður bankastjórnar. Hann er með sömu grunnlaun en fær 8 prósenta álag sem er 112.763 og tvöfalda bankaráðsþóknun sem er 220 þúsnd krónur. Að auki fá hann og hinir bankastjórarnir bíl til eigin afnota frá bankanum sem greiðir einnig símakostnað bankastjóranna.

Til samanburðar er forseti Íslands með 1.726.000 krónur í mánaðarlaun, aðeins minna en formaður bankastjórnar, forsætisráðherra er öllu lægri með eina milljón og þrjátíu þúsund krónur. Aftur til samanburðar þá er þingfararkaup rúmar 517 þúsund krónur og því er formaður bankastjórnar Seðlabankans með ríflega þingfararkaup meira í laun á mánuði en forsætisráðherra.

Samkvæmt heimildum fréttastofunnar geta millistjórnendur á fjármálamarkaðnum verið með svipuð og jafnvel töluvert hærri laun en seðlabankastjórarnir og bankastjórar viðskiptabankanna eru með margföld þessi laun.

Ragnar Arnalds var eini bankaráðsmaður Seðlabankans sem greiddi atkvæði gegn hækkun launa bankastjóranna. Hann segist skilja vanda Seðlabankans við að halda í starfsfólk, en það þýði ekki fyrir bankann að eltast við öfgana á almenna markaðnum og það geti haft skaðleg áhrif á launakerfi ríkisins í heild. Vilhjálmur Egilsson framkvæmdastjóri Samtaka atvinnulífsins óttast ekki að þetta leiði til mikils launaskriðs á almennum markaði.