Fá ekki byggingarleyfi vegna flóðahættu

Óvíst er hvort tuttugu eigendur sumarhúsalóða á Skeiðunum fá að byggja á lóðum sínum. Eftir flóðin á Suðurlandsundirlendinu í desember var ákveðið að byggingarleyfi yrðu ekki gefin út vegna flóðahættu. Eigendur lóðanna gætu því staðið uppi með verðlausar eignir.

Miklir vatnavextir urðu víða á Suðurlandsundirlendinu í desember á síðasta ári. Ár flæddu yfir bakka sína og settu hús og búfénað í hættu. Jafn stórt flóð og myndaðist á Skeiðunum hafði ekki orðið í áratugi. Sumarbústaðaeigendur í Merkurhrauni urðu innlyksa og það flæddi yfir sumarbústaðarland í Kílhrauni.

Ekki var talin flóðahætta á svæðinu og á síðasta ári fékkst samþykkt deiliskipulag fyrir nítíu sumarhúsalóðir í Kílhrauni. Tuttugu lóðir höfðu þegar verið seldar þegar flóðið varð en engir sumarbústaðir höfðu þó risið. Lóðareigendur greiddu frá einni og hálfri milljón króna hver fyrir sína lóð. Þeim hefur nú verið neitað um bygginarleyfi þar til búið er að meta flóðahættu en nokkrir þeirra höfðu látið byggja bústaði fyrir sig.

Aðeins flæddi inn á fáar lóðir en ákveðið var þó að gefa ekki út bygginarleyfi á svæðinu öllu. Eigandi landsins og seljandi lóðanna er ósáttur. Hann segir að vegir sem höfðu verið lagðir á tveimur stöðum á svæðinu hafi stíflað farveginn og vatn því farið inn á lóðir sem það hefði annars ekki farið inn á. Hann vill að stíflurnar verði fjarlægðar og byggingarleyfi gefin út.

Skipulagsyfirvöld á svæðinu segja stíflurnar ekki einu ástæðu þess hve flóðið varð stórt. Þau standa fast við þá ákvörðun sína að gefa ekki út byggingarleyfi að svo stöddu. Verið er nú að kortleggja flóðið og fara yfir eldri flóð. Ekki fyrr en að þeirri vinnu lokinni mun skipulagsnefndin taka ákvörðun um framtíð svæðisins.