Ríki og borg vinni einnig að því að bæta ástandið

Stefán Eiríksson, lögreglustjóri höfuðborgarsvæðisins, hyggst boða fulltrúa Reykjavíkurborgar og skemmtistaða í miðborginni á sinn fund til þess að reyna að finna leiðir til þess að uppræta það sem hann kallar ómenningu sem þrífst í miðbænum um helgar. Veitingahúsaeigandi í miðbænum segist reiðubúinn til viðræðna en segir að endurskoða þurfi lög sem snúa að veitingarekstri í miðbænum.

Stefán bendir á að hlutfall ofbeldisbrota í miðborginni, sem framin eru eftir miðnætti, hafi hækkað á síðustu árum og þá sé ásýnd miðborgarinnar og gesta hennar síðla nætur um helgar vægast sagt ömurleg. Meta þurfi reynsluna af löngum afgreiðslutíma skemmistaða í borginni og hugsanlega breyta honum og þá þurfi borgaryfirvöld að ákveða hvort beina eigi starfsemi dansstaða á önnur svæði í borginni.

Stefán segir ýmislegt í burðarliðnum af hálfu til þess að bæta ástandið. Hugmyndir séu uppi um að auka sýnileika lögreglu enn frekar með svokallaðri færanlegri lögreglustöð og þá standi til að fjölga eftirlitsmyndavélum í borginni.

Kallar Stefán eftir ábyrgð allra, ekki síst eigenda og rekenda skemmtistaða, sem verði að þrífa betur við staði sína og taka skýra afstöðu gegn fíkniefnum með því að tilkynna um alla slíka sölu og vísa slíkum sölumönnum á dyr. Með þetta að markmiði hefur Stefán að funda með bæði borgaryfirvöldum eigendum skemmtistaða til þess að bæta ástandið í miðbænum.

Kormákur Geirharðsson er einn þeirra sem rekur öldurhús í miðbænum. Hann segist reiðubúinn að ræða ástandið í miðbænum við yfirvöld en bendir á að ábyrgðin á ástandinu hvíli ekki eingöngu á skemmtistöðunum.

Borg og einnig ríki þurfi að koma að slíkum viðræðum og endurskoða þurfi lög og reglur sem snúa að veitingastarfsemi í miðbænum í heild. Veitingamenn reki starfsemi sem þeir reyni að lifa á með heiðarlegum hætti og ekki megi skella allri skuldinni á þá. Þá hafi veitingamenn opnað staði sína eins og almenningsklósett á Menningarnótt en hafi litlar þakkir fengið fyrir það.

Þá bendir hann á að nýtt reykingabann yfirvalda hafi stuðlað að auknum sóðaskap á götum miðborgarinnar og hugsanlega þurfi að endurskoða það.