Skrautlegt líf Playboy-kanínu

Fyrrverandi Playboy-kanínan Anna Nicole Smith lést á fimmtudagskvöldið. Hún fannst látin á Seminole Hard Rock Casino sem staðsett er rétt fyrir utan Miami.

Lífshlaup Önnu Nicole hefur verið í sviðsljósinu allt frá árinu 1993 þegar hún var valin leikfélagi ársins af karlatímaritinu Playboy. Ári síðar giftist hún olíukónginum Howard Marshall II en töluverður aldursmunur var á þeim skjötuhjúum, Marshall vantaði eitt ár í nírætt en Smith var nýbúin að fagna 27 ára afmæli sínu.

Fjölmiðlar eltu Önnu á röndum og sökuðu fyrirsætuna um að vera einungis á höttunum eftir fjármunum Marshalls. Þær sögur fengu síðan byr undir báða vængi þegar Marshall dó aðeins fjórtán mánuðum eftir brúðkaupið. Í ljós kom að hann hafði ánafnað Smith öllum sínum eigum og hófust í kjölfarið umfangsmikil réttarhöld sem sonur Marshall sótti. Niðurstaða í málinu fékkst ekki fyrr en í fyrra og úrskurðaði Hæstiréttur Bandaríkjanna að erfðaskrá Marshall skyldi standa og Smith væri réttmætur eigandi auðæfanna.

Anna fór um tíma huldu höfði en birtist öðru hvoru á síðum slúðurblaðanna og þá ekki síst vegna þeirra aukakílóa sem fyrirsætan hafði bætt á sig. Hún grenntist hins vegar með undraverðum hætti og skaust aftur fram í sviðsljósið þegar byrjað var að sýna raunveruleikaþætti um líf hennar árið 2002. Mál Önnu komst síðan aftur til kasta dómstóla þegar fyrrum unnusti hennar, Larry Birkhead, höfðaði mál á hendur henni og sagðist vera faðir stúlkubarnsins sem fyrirsætan hafði þá nýverið alið. Hún hélt því hins vegar statt og stöðugt fram að þetta væri ávöxtur ástar hennar og eiginmannsins, lögfræðingsins Howard Stern.

Stóra áfallið reið síðan yfir skömmu eftir að dótturin leit dagsins ljós í fyrsta skipti en þá lést tvítugur sonur Önnu, Daniel, úr ofneyslu eiturlyfja. Fjölmiðlar komu fyrst af fjöllum því fáir vissu af tilveru drengsins. Fyrirsætan var hundelt og hún krafin svara, jafnvel sökuð um að hafa brugðist barninu sínu.

Dauði Daniels fékk mikið á fyrirsætuna og voru margir bandarískir fjölmiðlar þeirrar skoðunar í gær að missirinn hefði hreinlega gengið af henni dauðri. Krufning á enn eftir að leiða í ljós dánarorsökina en samkvæmt móður Önnu Nicole er talið líklegast að einhvers konar ofneysla hafi orðið henni að aldurtila.