Óbætanlegur skaði ef íslenska væri aðeins töluð á heimilum

Félag íslenskra fræða harmar þær hugmyndir sem komið hafa fram að enska verði gerð að stjórnsýslumáli samhliða íslenskunni og enska verði hið ríkjandi mál íslenskra bankafyrirtækja.

Það var Ágúst Ólafur Ágústsson, varaformaður Samfylkingarinnar, sem varpaði fram fyrrnefndu hugmyndinni og Sigurjón Árnason, bankastjóri Landsbankans, þeirri síðarnefndu.

Í ályktun frá Félagi íslenskra fræða er bent á að það sé mikilvægt fyrir viðgang tungumálsins að á sem flestum sviðum verði áfram hugsað og talað á íslensku. Íslendingar hafi ekki ríkari ástæðu til að taka upp ensku sem stjórnsýslumál en aðrar þjóðir. Íslensk tunga sé framlag Íslendinga til heimsmenningarinnar og það væri óbætanlegur skaði ef svo færi að íslenska yrði aðeins töluð á heimilum en ekki alls staðar í samfélaginu.