Fengu ekki að leggja fram bókanir í bæjarstjórn

Hrönn Ríkharðsdóttir fulltrúi Samfylkingarinnar í bæjarstjórn segir að þegar forseti bæjarstjórnar hafi ákveðið að slíta fundi án þess að hægt væri að leggja bókanirnar fram hafi minnihlutinn gert athugasemd við fundarsköp. Forsetinn, Gunnar Sigurðsson, hafi hins vegar staðið við þá ákvörðun að slíta fundi og við það sat. „Við höfum tekið þá ákvörðun að birta bókanirnar þrátt fyrir þetta," segir Hrönn. Hún segir að Gunnar hafi neitað sér um orðið á fundinum og að það sé í skoðun út frá stjórnsýslulögum hvort farið hafi verið eftir settum reglum.

Hrönn segir minnihlutann vera á þeirri skoðun að ekki sé tímabært að gera þennan samning við Kalmansvík strax. Hún segir mun eðlilegra að bærinn fari sjálfur í það verk að útfæra skipulagið á svæðinu án aðkomu fyrirtækisins. „Við lítum á það þannig að ef bærinn vinnur að skipulagi með fyrirtækinu þá séu ekki líkur á því að því verði hafnað seinna í ferlinu," segir Hrönn og bætir því við að eðlilegra hefði verið að bærinn sæi alfarið um útfærslu skipulagsins þannig að öðrum áhugasömum aðilum væri gert kleift að koma að málinu á seinni stigum.

Hrönn segir einnig undarlegt að samkomulag bæjarstjórnarinnar við Kalmansvík skuli hafa verið undirritað þann 12. júní síðastliðinn. Þann sama dag var haldinn fundur í bæjarstjórninni án þess að samkomulagsins hafi verið getið. „Síðan heldur Kalmansvík kynningarfund um málið fyrir fulltrúa meirihlutans en ekki fyrir okkur í minnihlutanum, það var ekki gert fyrr en seinna," segir Hrönn Ríkharðsdóttir.

Bókanir minnihlutans sem ekki var hægt að leggja fram má sjá hér í viðhengi.