Lohan sökuð um lygi

Eins og sagt hefur verið frá gekkst ungstirnið Lindsay Lohan undir uppskurð fyrr í mánuðinum vegna botnlangabólgu. Lohan var lögð inn á sjúkrahús og botnlangi hennar fjarlægður 4. janúar. Leikkonan var svo útskrifuð degi síðar.

Sérfræðingar ytra leyfa sér nú að efast um sannleiksgildi sögunnar, þar sem Lohan sást á djamminu sama kvöld og henni var sleppt af sjúkrahúsinu.

Leikkonan snæddi kvöldverð á veitingahúsinu Pace og tók síðan stefnuna á klúbbinn Les Deux. Sólarhring síðar var hún aftur mætt á dansgólfið, og hefur ekki látið deigan síga við djammið síðan.

In Touch hefur eftir dr. Lynn Ramirez að slík hegðun sé útilokuð fyrir manneskju sem nýverið hefur gengist undir uppskurð og dregur stórlega í efa að slík aðgerð hafi verið framkvæmd á leikkonunni ungu. „Engin viti borin manneskja myndi fara út að dansa eftir að hafa gengist undir botnlangauppskurð," sagði Ramirez.