Leggst gegn nektardansstöðum

Lögreglustjórinn á höfuðborgarsvæðinu hefur ákveðið að leggjast alfarið gegn rekstri nektarstaða á höfuðborgarsvæðinu. Þetta kemur fram í umsögn embættisins um leyfisveitingu til handa nektardansstaðnum Goldfinger í Kópavogi. Ásgeir Þór Davíðsson, eigandi Goldfinger segir að áfram verði dansað á staðnum.

Lögreglustjórinn á höfuðborgarsvæðinu hefur ákveðið að leggjast alfarið gegn rekstri nektarstaða á höfuðborgarsvæðinu. Þetta kemur fram í umsögn embættisins um leyfisveitingu til handa nektardansstaðnum Goldfinger í Kópavogi. Ásgeir Þór Davíðsson, eigandi Goldfinger segir um fimmtíu manns missa vinnuna ef af verður.

Samkvæmt lögum um veitingastaði, gististaði og skemmtanahald sem tóku gildi þann 1. júlí síðast liðinn er óheimilt að bjóða upp á nektarsýningar né með öðrum hætti að gera út á nekt starfsmanna eða annarra sem á staðnum eru. Þó er hægt að veita undnaþágu frá þessu lagaákvæði að fenginni umsögn sex aðila, þ.e. sveitarstjórnar, heilbrigðisnefndar, slökkviliðs, vinnueftirlits, byggingarfulltrúa og lögreglu.

Þegar eigandi súludansstaðarins Goldfinger sótti um endurnýjun á leyfi fyrir sínum rekstri óskaði sýslumaðurinn í Kópavogi eftir þessum umsögnum og ákvað í kjölfarið að nektardans yrði bannaður á staðnum.

Allt útlit er því fyrir að ekki verði dansaður nektardans á Goldfinger á næstunni. Ástæðan er umsögn lögreglustjórans á höfuðborgarsvæðinu en í henni segir:

,,Slíkir staðir hafa mikil áhrif á umhverfið og er meiri þörf á eftirliti og/eða löggæslu við slíka staði."

Þá segir: ,,Nokkur reynsla er af því hér á landi að starfsemi sem býður upp á nektardans byggir nær eingöngu á ungum erlendum stúlkum sem hingað koma til starfa. Reynst hefur ómögulegt að kanna hjá þeim stúlkum sem hingað hafa komið um stöðu þeirra og aðstæður og ástæðu þess að þær stunda þessa iðju og hvort þær séu þvingaðar til þess með einum eða öðrum hætti."

Enn fremur segir í umsögninni að rannsóknir erlendis hafi sýnt að stúlkur sem taka þátt í slíkri starfssemi séu oft þolendur misneytingar af ýmsu tagi.

Síðan segir:

,,...þykir rétt vegna ríkra mannúðarsjónarmiða og jafnframt almannahagsmuna og löggæslusjónarmiða að neita alfarið um leyfi til þess að heimila veitingastöðum að reka starfsemi sem býður upp á nektardans."

Ásgeir Þór Davíðsson, eigandi Goldfinger hefur ákveðið að skjóta synjuninni til dómsmálaráðuneytisins með vísan til stjórnsýslulaga. Hann segir að ótrúlegt sé hvernig sýknt og heilagt sé verið að ráðast á sig. Hann segist óttast að Ísland sé orðið að lögregluríki.

Goldfinger hefur áfram leyfi til vínveitinga og skemmtanahalds og segir hann að áfram verði dansað á staðnum, varla sé hægt að banna tangó eða einhvern annan dans.