Oliver sagður styðja við bakið á Íþróttaálfinum

„Við ætlum að vera með orkuátak í öðrum löndum en hvenær það verður er hins vegar ekki orðið ljóst,“ útskýrir Kjartan Már Kjartansson, upplýsingafulltrúi Latabæjar.

Breska blaðið The Sun greindi frá því á mánudaginn að Íþróttaálfurinn og félagar hygðust hleypa slíku verkefni af stokkunum á næstu misserum. Svokallað Orkuátak hefur verið haldið tvívegis á Íslandi og notið mikilla vinsælda en þar geta krakkar unnið sér inn verðlaun fyrir heilsusamlegt líferni og fékk Latibær Norrænu heilsuverðlaunin árið 2004 fyrir framtakið.

Enn fremur var því haldið fram af blaðamanni The Sun að sjónvarpskokkurinn heimsfrægi, Jamie Oliver, hefði lýst yfir stuðningi við átak Latabæjar en Kjartan segir þetta vera frekar ótímabæra frétt og byggða á sandi. „Oliver er þúsund sinnum stærri heldur en við í Bretlandi og hefur mikinn fjölda starfsmanna í kringum sig.

Magnús og hann hafa ekki átt fund saman en við höfum komið okkur í samband við einn af starfsmönnum Olivers. Málið er hins vegar á algjörum byrjunarreit og það getur brugðið til beggja vona í þessu,“ segir Kjartan. „Við erum bara litlir karlar við hliðina á Oliver,“ bætir hann við en velferð og heilsa barna í Bretlandi hefur verið Jamie Oliver hugleikin og fór hann sjálfur í mikla herferð til að bæta fæðu í skólum fyrir nokkrum árum.

Breskir fjölmiðlar sýndu viðtali sem birtist á sunnudaginn við Magnús Scheving í Sunday Times mikinn áhuga og skrifuðu flestir fréttir byggt á því viðtali. Kjartan segir að síminn hafi varla stoppað hjá sér í gær eftir að The Sun birti sína frétt og vildu fá að vita hvenær Orkuátakið brysti á enda virðist vera mikil þörf á slíkri herferð í Bretlandi.

„Margar af þeim fréttum sem hafa birst eru frekar hæpnar,“ útskýrir Kjartan og áréttar að þetta sé ekki eitthvað sem sé að fara að gerast á allra næstu dögum.

Þessi mikli áhugi breskra fjölmiðla sýnir hins vegar glöggt hversu vinsælt fyrirbærið er orðið í Bretlandi en Latibær er nú sýndur á sjónvarpsstöðvunum BBC og Nickelodeon. Auk þess komst smáskífan Bing Bang með lokalagi þáttarins í fjórða sætið á breska smáskífulistanum sína fyrstu viku á lista og stóra platan er þegar komin í gull. freyrgigja@frettabladid.is