4 1/2 árs fangelsi fyrir tilraun til manndráps

Héraðsdómur Vestfjarða dæmdi í dag Ólaf Þór Guðmundsson í fjögurra og hálfs árs fangelsi fyrir tilraun til manndráps, en Ólafur skaut af haglabyssu að konu sinni á heimili þeirra í Hnífsdal í síðasta mánuði. Þá var Ólafi gert að greiða konunni eina milljón í miskabætur og tæplega eina og hálfa milljón króna í sakarkostnað.

 

Ólafur og kona hans voru stödd á heimili þeirra hjóna, föstudagskvöldið 8. júní þegar slóg í brýnu á milli þeirra. Samkvæmt dómi héraðsdóms rifust þau hjón um vinnu konunnar. Konan lagðist síðan inn í rúm til að fara að sofa í hjónaherbergi á efri hæð hússins. Maðurinn fór þá niður og sótti haglabyssu en framburðum þeirra hjóna um hvað gerðist næst bar ekki saman. Konan segir Ólaf hafa hótað sér lífláti og ógnað sér með byssunni og hún hafi því ákveðið að fara af heimilinu. Hann hafi þá elt hana niður og um leið og hún hafi stigið yfir þröskuldinn hafi hann skotið í áttina að sér. Ólafur neitaði hins vegar sök og sagði skotið hafa hlaupið úr byssunni fyrir slysni. Dómnum þótti hins vegar sannað að útilokað væri að hamarinn á byssunni hefði spennst upp fyrir tilviljun og aðstæður á vettvangi hafi sýnt að framburður Ólafs fær ekki staðist. Því sé ljóst að Ólafur hafi skotið að konu sinni vitandi vits eins og segir orðrétt í dómnum.

 

Málið vakti mikla athygli á sínum tíma. Lögreglan á Vestfjörðum var kölluð að húsinu eftir að hafa fengið tilkynningu um að vopnaður maður væri í því. Þegar lögregla kom á staðinn greip hún til öryggisráðstafana og rýmdi nærliggjandi hús meðan beðið var eftir sérsveit ríkislögreglustjkóra. Umsátur lögreglu varði í tæpa tvo klukkutíma eða allt þar til Ólafur fékkst með hvatningu til að koma til móts við lögreglu.

 

Við ákvörðun refsingar leit dómurinn til þess að brot Ólafs beindist að lífi og heilsu konu hans og þótti verknaðurinn stórhættulegur. Þá var litið til þess að Ólafur hefur hreint sakarvottorð og að ásetningur hans hafi ekki verið styrkur og einbeittur. Því þótti héraðsdómi Vestfjarða hæfilega refsingu vera fjögur og hálft ár. Þá var Ólafi gert að greiða konunni eina milljón í miskabætur og tæplega eina og hálfa milljón í sakarkostnað.