Háskólum mismunað eftir rekstrarformi

Þorsteinn sagði enn fremur brýnt að skapa háskólum fjárhagsleg skilyrði til áframhaldandi vaxtar. Auknar fjárveitingar þyrftu að koma frá ríkisvaldinu, atvinnulífinu, alþjóðlegum uppbyggingarsjóðum og að einhverju leyti frá nemendum sjálfum. Hins vegar ættu stjórnvöld ekki að freistast til að innheimta skólagjöld í grunnámi við opinbera háskóla hér á landi.

Þorsteinn lýsti Háskólann á Akureyri reiðubúinn til fullrar samvinnu við stjórnvöld um draga úr mismuninni sem byggst hefði upp milli einkaháskóla og opinberra háskóla í landinu.

Þorsteinn sagði enn fremur að miklar breytingar hefðu orðið á Akureyrabæ með tilkomu háskólans en í ár eru 20 ár frá stofnun hans. Háskólinn á Akureyri hefði átt stóran þátt í að snúa við þeirri óheillastöðu sem bærinn var í þegar skólinn tók til starfa. Þá hafi atvinnuleysi verið mikið og fólksflótti frá Akureyri. Samfélagshlutverk háskóla verði seint ofmetið, þeim sé ekki eingöngu ætlað að þjóna fræðunum heldur einnig langtímahagsmunum samfélagsins alls.

Hann kvað enn fremur nauðsynlegt að öflugir opinberir háskólar væru starfræktir á Íslandi, annars vegar til þess að fullnægja kröfunni um jafnrétti til náms og hins vegar til þess að gegna hinu ríka samfélagshlutverki sem háskólar einir geti gegnt.

Alls voru 372 kandídatar brautskráðir í dag frá fjórum deildum skólans en það er langstærsti hópur sem brautskráðst hefur frá skólanum í 20 ára sögu hans. Konur eru yfirgnæfandi meirihluti kandidata að þessu sinni, 299, en karlar eru 73.

Flestir kandídatar voru brautskráðir frá Kennaradeild eða 150. Frá Viðskipta- og raunvísindadeild voru brautskráðir 93 kandídatar, 68 frá Heilbrigðisdeild og 61 frá Félagsvísinda- og lagadeild.

Um þriðjungur útskriftarhópsins stundaði fjarnám fyrir milligöngu háskólasetra og símenntunarmiðstöðva á 14 stöðum á landinu, flestir frá Hafnarfirði, Árborg, Akranesi, Reykjanesbæ, Vestmannaeyjum og Vopnafirði.