Grunnskólar og nemar verðlaunaðir fyrir góða frammistöðu

Grandaskóli, Víkurskóli, Öskjuhlíðarskóli, Húsaskóli, Laugarnesskóli og Foldaskóli hlutu í dag hvatningarverðlaun menntaráðs Reykjavíkurborgar sem veitt voru í fimmta sinn í dag. Þar að auki fengu þrjátíu nemendur nemendaverðlaun ráðsins.

Hvatningarverðlaun menntaráðs Reykjavíkur eru veitt árlega sex til átta skólum fyrir framúrskarandi þróunar- og nýbreytniverkefni. Alls bárust 36 tilnefningar frá skólum, kennurum, foreldraráðum og foreldrafélögum.

Þá sendir hver grunnskóli tilnefningar til nemendaverðlaunanna en markmiðið með þeim er að hvetja grunnskólanema á öllum aldri til að leggja sig enn betur fram í námi, félagsstarfi og skapandi starfi.

Í dag voru verðlaun veitt fyrir góðan námsárangur, framfarir í námi, félagsstörf, samskiptahæfni og frumkvæði, leiðtogahæfileika, frammistöðu í íþróttum, listum, listsköpun og fleiru.