Ince og Coppell ósáttir við ráðningu Capello

Paul Ince, stjóri MK Dons, og Steve Coppell, stjóri Reading, eru ósáttir við að Englendingur hafi ekki verið ráðinn landsliðsþjálfari þar í landi.

Ince sagði að ráðning Capello væri áfellisdómur fyrir enska knattspyrnu. „Við erum með nægilega góða knattspyrnustjóra í Englandi sem gætu staðið sig alveg eins vel," sagði hann.

Hann segir að enskir knattspyrnustjórar leggi mikið á sig til að sanka að sér reynslu á ferlinum. „Svo þegar landsliðið fær erlendan þjálfara spyr maður sjálfan sig hver sé eiginlega tilgangurinn með því."

Coppell tók í sams konar streng. „Þetta er sorglegt ef ég á að segja alveg eins og er. Ég er stoltur af mínu starfi sem enskur knattspyrnustjóri og ég hefði viljað að Englendingur hefði verið ráðinn í starfið."

Annar sem var mótfallinn ráðningunni var Tony Adams, fyrrum fyrirliði enska landsliðsins, rétt eins og Ince.

„Það er til mikið af hæfum knattspyrnustjórum í Englandi og ég held að það hefði verið betra ef við hefðum reynt að ráða einhvern enskan í starfið."